Ano ang AR? Paliwanag tungkol sa augmented reality.

Habang tumatagal, lalong nagiging karaniwang bahagi ng pang-araw-araw na buhay ang augmented reality (AR). Matagal-tagal na itong ginagamit sa mga partikular na sci-fi na pelikula — gaya ng Terminator series at Minority Report — para magpakita ng tuloy-tuloy na daloy ng impormasyon na lumalabas sa isang headset display, o sa isang holographic terminal. Pero ang mga sinauna at medyo kakatwang paglalarawan ng AR ay nagbibigay-daan na ngayon sa mga aktwal na pang-araw-araw na sitwasyon ng paggamit ng augmented reality. 

Ginagawa ng IKEA ang marami sa mga catalog image nito gamit ang virtual photography; ngayon, pwedeng gamitin ng mga customer ang mga image na ito bilang batayan ng isang AR experience, nang tinitingnan ang mga 3D image sa environment nila sa tunay na mundo para malaman kung babagay ang furniture. Napakaraming produktong available sa Amazon ang pwede na ring matingnan sa AR sa ganitong paraan. At hindi lang sa oportunidad sa pagbebenta magagamit ang AR; gumagamit ng AR ang mga journalist at news organization, kabilang ang The New York Times, para maghatid ng mga balita nang mas may depth at impact. Matagumpay na ginamit ang AR sa classroom, para mag-aral ng medisina, at pati sa pagsasanay sa militar.

Napakaraming gamit ng pambihirang teknolohiyang ito. Ang science fiction ng Hollywood ay pinalitan na ng aktwal na science fact.

Pero ang magagandang AR experience na ginagawa ngayon ay mga simpleng halimbawa lang ng kayang gawin ng medium. Nauunawaan ng mga AR application ang mundo sa paligid ng device, at pinapaganda nito ang pisikal na mundo gamit ang digital text, mga image, bagay, at tunog. Mahusay na pinagsasama ng mga pinakamagandang AR experience ang digital na impormasyon at ang interactive at konektadong multimedia content, at ang magandang depth ng pisikal na mundo.

“Ang AR ay ang paraan kung paano mahusay na maisasama ang teknolohiya sa bawat aspeto ng mga buhay natin para matulungan tayong makamit ang mga layunin natin,” sabi ni Stefano Corazza, fellow at head ng AR sa Adobe. 

Sa augmented reality, naglalagay ng karagdagang content sa tunay na mundong nasa harap mo. Ang AR ay naglalagay ng digital content na mas nagpapaganda sa nakikita mo, at makikita mo sa pamamagitan ng espesyal na AR glasses o sa pamamagitan ng camera sa telepono mo, tablet mo, o iba pang device.

Kung minsan, napagpapalit ang AR at virtual reality (VR). Narito ang mga pagkakaiba ng virtual at augmented reality: 

• Mundo: Ang AR ay isang digital experience na ibinase sa pisikal na mundo, habang ang VR ay ganap na virtual. Sa VR, iiwanan mo ang realidad at papasok ka sa isang self-contained na mundo na ginawa mula sa mga photographic image o sa isang computer generated (CGI) na mundo, o pareho nang sabay.
   
• Hardware:  Maraming AR app ang nangangailangan lang ng smartphone at tablet para maranasan ang karadagang content ng mga ito. Hindi tulad ng mga VR headset, kung saan hindi na makikita ang tunay na mundo, ang mga AR headset at smart glasses ay may mga transparent lens gaya ng eyeglasses, kaya nakakapaglagay ang mga ito ng karagdagang content sa paligid mo.

Malaki ang posibilidad na pagkakakitaan ang AR technology sa napakaraming industriya — mula sa pagbubukas ng mga bagong marketing channel hanggang sa pagpapahusay ng mga proseso ng pagsasanay ng empleyado. 

Maraming aplikasyon ang AR sa industriya ng entertainment, kasama ang pelikula at gaming. Ang Pokémon GO (2016) na siguro ang pinakakilalang halimbawa ng AR app na naging viral, noong nababad ang milyon-milyong tao sa buong mundo sa isang mahiwagang mundong tinitirhan ng mga cartoon character.

“Ipinapakita ng Pokémon GO kung paano makakapagdulot ng malaking epekto ang kahit kaunting pagsasama ng pisikal at digital na mundo,” sabi ni Daniel Plemmons, AR design manager sa Adobe. “Sa paggamit ng mapa ng mundo at GPS para maglagay ng Pokémon sa mga lugar na mahalaga sa mga manlalaro, nagtatagumpay ang laro sa pagbibigay ng mas malawak na konteksto sa mga digital na character na iyon. Ang personal na kontekstong iyon, kasama ang napakasikat na isinasalaysay na mundo ng Pokémon, ay naging mahiwagang kumbinasyon. Idagdag pa doon ang simpleng AR visual effects ng Pokémon GO at mayroon ka nang experience na magpapahanga sa milyon-milyong tao."

Ibinibigay rin ng AR ang posibilidad na maglakbay sa nakaraan. Magsuot ng AR glasses at, gamit ang mga CGI enhancement, makikita mo sa walk through mo kung ano ang hitsura ng Roman Forum sa rurok nito, 2,000 taon ang nakalipas. 

Pwede ring pagsamahin ng mga AR app ang entertainment at edukasyon. Ang Google Lens, halimbawa, ay nakakapagbigay ng impormasyon tungkol sa halamang kinaiinteresan mo na nakita mo habang naglalakad ka sa kalikasan, o nakakapagbigay ng detalye tungkol sa kasaysayan ng isang gusali na madadaanan mo habang naglalakad sa lungsod. Magagamit ito na parang si Siri, pero, sa halip na tanungin ito para sa impormasyon, pwede mong idirekta lang ang tingin mo o lens mo sa bagay o lugar na kinaiinteresan mo. 

Hindi lang species ng halaman ang matutukoy ng mga AR device at app, pero pati mga produkto. Sa AR, ang bawat item na naibenta ay nagiging walking advertisement kapag ginamit ng isang potensyal na customer ang AR glasses o smartphone camera niya para tukuyin kung sino ang gumagawa ng item at kung saan niya ito mabibili. 

Sa mga virtual fitting na pinapagana ng AR, maisusukat ng mga customer ang damit para malaman kung anong hitsura nito kapag isinuot nila. Halimbawa, pwedeng magsukat ng sapatos ang mga customer sa pamamagitan ng AR experience sa iPhone nila. Mapapalaki rin ng mga AR app ang posibilidad na makipag-ugnayan sa mga customer, at pwede itong magmungkahi na subukan ang asul na sweater kung hindi maganda ang berdeng sweater. 

Ang AR ay nagbibigay ng oportunidad na maglibot sa mga kwarto at magpasya kung talagang masisiyahan ka sa bagong layout at para suriin ang mga digital na design sa tunay na mundo. Kung gusto mong makita kung ano ang magiging hitsura ng isang sectional couch sa sala mo pero hindi interesado ang showroom ng furniture na ipahiram ito sandali, may madaling solusyon ang AR. Para sa mga arkitekto at contractor, pwedeng gamitin ang AR para malibot ng mga kliyente ang planadong pagdaragdag at makita kung paano nito mababago ang hitsura ng bahay nila bago ma-finalize ang mga design. 

Pwede ring gamitin ang AR para gumawa ng pinahusay na bersyon ng pagsasanay ng empleyado nang real time. Marami sa atin ang nahirapan sa mga manual para sa mga kitchen appliance — posibleng mas mahirap pa doon ang pag-aaral ng pagpapatakbo ng makina sa isang assembly line. Magiging mas nakakaengganyo at malinaw ang pagsasanay sa tulong ng AR. Sa halip na subukang alamin kung tama ang pagkakahawak mo sa device sa pamamagitan ng pag-intindi ng mga naaangkop na drawing sa isang manual, masasabi sa iyo ng isang AR-enabled virtual tutor sa magalang na paraan na kailangan mo itong iikot sa ibang direksyon. 

Para sa mga designer na interesado sa pag-explore ng potensyal ng AR, ang Adobe Aero ay isang libreng authoring application na available sa desktop (beta) at mobile (iOS lang) na nagbibigay sa mga creator ng kakayahang bumuo ng mga interactive na AR experience sa madaling maintindihang paraan, hindi kailangan ng kasanayan sa pag-code.