Ang establishing shot ay karaniwang wide o extreme wide shot ng mga gusali o tanawin. Maaaring kasama sa mga shot na ito ang mga karatula, landmark, o iba pang malinaw na palatandaan ng lugar at panahon. Makakatulong ito para kumbinsihin ang audience mo na ang aksyon ng pelikula mo ay nangyayari sa isang cafe sa Paris o sa isang kantina sa Tatooine at hindi sa isang soundstage sa L.A.
Hindi kailangang maging pinakamahusay na shot sa pelikula mo ang establishing shot. "Ang pinakamadaling gawin sa mga pelikula sa Hollywood ay ang helicopter shot ng Golden Gate Bridge. 'Ah, nasa San Francisco tayo, naiintindihan ko,'" sabi ng graphic designer at independent film producer na si Nick Escobar. "Itinatakda nito kung nasaan ka, ipinapaalam sa iyo kung ano ang nangyayari, at puwede kang bigyan ng ideya tungkol sa panahon, batay sa paraan ng pag-shoot at color grading ng lungsod."
Ang isa sa mga pinakamahirap makalimutang establishing shot sequence sa kasaysayan ng pelikula ay ang pambungad sa horror film ni Stanley Kubrick na The Shining. Dumadausdos ang camera sa ibabaw ng mga kagubatan at bundok bago ipakita ang hotel sa tuktok ng bundok kung saan nagaganap ang aksyon ng pelikula. Noong ginawa ang pelikulang ito, tanging malalaking produksyon lang ang may kakayahang gumastos sa helicopter at crew para makuha ang footage na iyon, pero ang mga ganitong uri ng shot ay mas abot-kaya na ngayon gamit ang mga drone.
"Tuwing gumagalaw ang camera, nagpapahiwatig ito sa manonood ng point of view," sabi ng manunulat at filmmaker na si David Andrew Stoler. "Kung gumagalaw ka sa establishing shot mo, ang tanong ay 'Sino ang nakakakita nito? Kaninong pananaw ako nakaposisyon?'" Dagdag pa ng direktor at manunulat na si Van Jensen, "Dapat kang mag-shoot ng eksena kung saan hindi mo kailangang i-capture ang tunog, dahil sobrang ingay ng mga drone."
Hindi mo palaging kailangang kumuha ng epic view ng skyline ng New York City. Puwede mong ihanda ang audience mo para sa eksena gamit ang set design at props. Halimbawa, ang opisina ng therapist ay maaaring may mga diploma sa pader at isang sofa na may silya sa tabi nito. Sinasabi ng mga detalyeng iyon sa mga manonood kung nasaan sila eksakto o kung ano ang kailangan nilang malaman.
Naaalala ni Jensen ang paggawa ng music video na naganap sa isang house party. "Ang partikular na pambungad na shot ay isang close-up shot ng beer na ibinubuhos sa baso. Inisip ko ito bilang establishing shot kahit na hindi ito karaniwan," sabi niya.
May puwang para sa pagkamalikhain kahit sa mga transitional shot na ito. Puwede kang mag-eksperimento sa framing, posisyon ng camera, mababang anggulo o mataas na anggulo at lumikha ng isang bagay na maganda sa halip na isang bagay na nagbibigay lang ng kinakailangang impormasyon.
Huwag kalimutan na isa kang tagapagsalaysay, at may silbi dapat ang bawat shot sa kuwento mo. "Kung mabilis kang nagpapalipat-lipat sa iba't ibang lokasyon, tulad ng sa Law and Order, makakatulong ang paggamit ng establishing shot," sabi ni Stoler. "Pero kung gumagawa ka ng maikling pelikula, puwede mong mas mabilis na i-set up ang impormasyong iyon."
Bigyang-pansin ang lokasyon mo at ibase ang kuwento mo rito. "Paglaruan ang mga anggulo," sabi ni Jensen. "Paglaruan ang espasyo para mahanap ang pinakamagagandang shot sa loob nito." Kung gusto mong kumuha ng wide o long shot, tiyaking may sapat kang espasyo. "Ang mga baguhan ay may posibilidad na mag-shoot ng napaka-flat, na walang gaanong laman sa background. Kaya huwag masyadong lumapit," sabi ni Stoler. "Kailangan mong lumayo nang sapat para makakuha ng magandang lalim."
Kumuha ng mga kinakailangang wide, medium, at close-up shot, pero maging bukas sa ibang posibilidad. "Gusto mong pumasok sa editing room na may samot-saring ekstrang footage," sabi ni Dominic Duchesneau, na isang documentary filmmaker at editor. "Maaaring iba ang pananaw ng editor sa kuwento kumpara sa direktor o cinematographer, kaya kung nasa lokasyon ka at may oras, subukan ang mga bagay na maaaring mas makatulong sa kuwento." Palagi mong puwedeng subukan ang mga kakaibang establishing shot gamit ang Adobe Premiere para gumawa ng rough cut.
Panoorin ang mga pelikulang gusto mo, at bigyang-pansin ang shot sa simula ng bawat eksena. Hanapin ang mga nagustuhan mo, at subukang gawan ng sarili mong twist. Tandaan na dapat ipaalam ng mga shot na ito kung nasaan tayo, pero puwede rin silang makatulong sa pagbuo ng karakter, pagtatag ng relasyon ng mga karakter, at pagdagdag sa mood na gusto mong likhain.
Based on your location, we think you may prefer the United States website, where you'll get regional content, offerings, and pricing.
